Аҳолини рўйхатга олиш жараёни нима учун керак?

• 02.Июля.2025
• 91

Ўйлаб кўринг: сиз яшаётган маҳаллада мактаб етишмайди, шифокорлар оз, транспорт қатнови кам. Шу муаммоларнинг асосий сабаби нимада, деб ўйлайсиз?

Ечим шунда: аҳолини рўйхатга олиш!

Бу қандай фойда беради?

1. Шифохона керакми? Шаҳар ёки қишлоқ бўлиши фарқ қилмайди!

Агар аҳолининг сони, ёши ва соғлиғи ҳақида аниқ маълумот бўлса, қаерга қандай шифохона кераклиги аниқланади. Масалан, кексалар кўп яшайдиган ҳудудга юрак ва қандли диабет шифохонаси керак. Болалар кўп бўлса – педиатрлар сони оширилади.

2. Болалар мактабда сиқилиб ўтиряптими?

Рўйхатга олиш орқали ёшлар, мактабга борадиганлар сони маълум бўлади. Натижада, янгидан мактаблар қурилади, ўқитувчилар сони кўпайтирилади. Ҳар бир бола қулай шароитда ўқийди.

3. Жамоат транспорти камми?

Аҳолининг зичлиги ва ҳаракатланиш йўналишлари таҳлил қилинади. Шунга қараб автобуслар сони кўпайтирилади, янги йўналишлар очилади. Рўйхатга олиш сизга тезроқ ва қулайроқ манзилингизга етиб бориш имконини беради.

4. Давлат ёрдамидан кимлар фойдаланади?

Айниқса, кам таъминланган оилалар, ёлғиз кексалар ва ногиронлиги бўлган фуқаролар ҳақида аниқ маълумот керак. Рўйхатга олиш орқали ёрдам кимга кераклигини аниқлаш осонлашади, ёрдам бевосита сизга келади.

5. Янги уйлар, янги имкониятлар!

Аҳоли сони ошса – уй-жойга эҳтиёж ҳам ошади. Рўйхатга олиш бу эҳтиёжни аниқ кўрсатади. Янги уйлар, арзон ипотека лойиҳалари – барчаси сизнинг иштирокингизга боғлиқ.

Бу жараён хавфсиз ва махфий!

Сиз ҳақингиздаги маълумотлар ҳеч қаерда эълон қилинмайди. Фақат рақамлар сифатида қайд этилади. Исмингиз, манзилингиз, шахсий маълумотларингиз махфий сақланади.

Хулоса: бу иш сизсиз бўлмайди!

Сиз рўйхатдан ўтсангиз – давлат сизнинг қаерда, қандай яшаётганингизни билади. Бу эса сиз учун қулайлик, фарзандларингиз учун имконият, маҳаллангиз учун янги инфратузилма демакдир!

Рўйхатга олиш бу – сиз, оилангиз ва келажагингиз учун!

Мустақиллик йилларида илк бор ўтказилиши режалаштирилаётган аҳолини рўйхатга олиш тадбирида фаол иштирок этинг!

Равшанжон ЖИЯНОВ,

Наманган вилояти статистика бошқармаси бошлиғи ўринбосари