Икки йилдан бери алимент тўламаётган қарздор топилди

• 25.Апреля.2024
• 325

Халқимизда “Дардинг бўлса бўлсин, қарзинг бўлмасин” деган нақл бор. Лекин, бу ҳикматли ибора куни кеча ўз фарзанди учун моддий таъминотни бермай келган, боз устига қочиб юрган қарздорга гўёки тегишли эмасдек. Акс ҳолда у бир нафар фарзанди таъминотини ўз вақтида жойига қўйиб қўярди.

Маълум бўлишича, И. И. турмуш ўртоғи билан 2022 йил ажрашиб кетади. Суд буйруғига кўра, ундирувчи Н. Ж. фойдасига бир нафар фарзанди учун вояга етгунга қадар ҳар ойда топган даромадидан ¼ миқдорида алимент ундирилиши белгиланади. Қарздор эса шу кунга қадар умуман тўлов қилмайди. Боз устига давлат ижрочиси яшаш хонадонига борса йўқ бўлади, тайинли бир жойда ишламайди. Устига-устак беркиниб, қочиб юради.

Натижада қарздорлик тўпланиб, 24,3 млн. сўмга бориб етади. Унга нисбатан қидирув эълон қилиниб, топиш чоралари кўрилди. Олинган маълумотлар фойда бериб, норасмий никоҳдан ўтган турмуш ўртоғиникида яшаб юргани маълум бўлди.

Бошқарма қидирув шўъбаси инспектори билан ҳамкорликда қарздор ота ушланди. Бу бўйича тўпланган ҳужжатлар судга тақдим этилди ва мазмунан кўрилиб, 15 сутка маъмурий қамоқ жазоси тайинланди.

Илҳомжон ДОЛИЕВ,

МИБ Наманган шаҳар бўлими давлат ижрочиси.