Наманганда фаол тиббиётчилар рағбатлантирилди

• 10.Ноября.2024
• 112

Наманган шаҳридаги «Шодиёна»  тантаналар мажмуида «Тиббиёт ходимлари куни» муносабати билан ўтказилган байрам тадбирида соғлиқни сақлаш тизими ходимларига иззат-икром кўрсатилди.

Вилоят ҳокими Шавкат Абдураззоқов тўкин дастурхон атрофида жамулжам бўлган шарафли касб эгаларини байрам билан қутлаб, самимий тилакларини билдирди. Халқимиз соғлигини муҳофаза қилиш, аҳолига сифатли тиббий хизмат кўрсатиш, касалликларнинг олдини олиш ва самарали даволаш, тизим моддий-техник базасини мустаҳкамлаш борасида бажарилаётган ишлар ўз натижасини бераётганлигини таъкидлади.

Тантанали тадбирда Президентимиз фармонига асосан давлатимизнинг юксак мукофотлари билан тақдирланган Поп тумани кўп тармоқли марказий поликлиникаси мудири Ҳафиза Жалоловага иккинчи даражали «Соғлом авлод учун» ордени  ва Мингбулоқ туманидаги «Med Layt» хусусий клиникаси раҳбари – шифокор-терапевти Улуғбек Мусаевга «Шуҳрат» медали топширилди.

Бундан ташқари, узоқ йиллар самарали хизмат кўрсатиб келаётган олти нафар оқ халат жонкуяри «Ўзбекистон Республикаси Соғлиқни сақлаш аълочиси» кўкрак нишони ҳамда бир қатор соҳа илғорлари вилоят ҳокимининг фахрий ёрлиқ ва қимматбаҳо совғалари билан тақдирланди.

– Салкам эллик йилдан буён соғлиқни сақлаш соҳасида фаолият юритиб келаётган шифокор сифатида айтишим керакки, кечаги тиббиёт билан бугунгисини асло тенглаштириб бўлмайди, – дейди Республика Шошилинч тиббий ёрдам илмий маркази Наманган филиали кардиология бўлими мудири, олий тоифали кардиолог-терапевт Гулчеҳра Ибрагимова. – Охирги йилларда тиббий хизмат кўрсатишнинг замонавий усуллари жорий этилди. Масалан, тобора ёшариб бораётган юрак қон-томир касалликларига самарали ташхис қўйиш ва уни даволаш мақсадида интервенцион кардиология анча ривож топди. Сўнгги жиҳоз ва ускуналар олиб келиб ўрнатилди. Хориждаги ҳамкасблар билан ўзаро тажриба алмашиш ўз мевасини бермоқда. Камтарона меҳнатларимиз муносиб баҳоланиб, «Ўзбекистон Республикаси Соғлиқни сақлаш аълочиси» кўкрак нишони билан тақдирлашганидан беҳад миннатдорман.

Шодиёнада таниқли санъат усталари ва ёш ижрочилар иштирокидаги концерт дастури байрамга кўтаринки завқу шавқ бағишлади.

Оқилхон ДАДАБОЕВ.
Вилоят соғлиқни сақлаш бошқармаси ахборот хизмати суратлари.