Тарих ва келажакни боғловчи маскан

• 01.Ноября.2024
• 114

Ички ишлар органларининг 33 йиллигига муносиб туҳфа сифатида  ИИВ Наманган академик лицейида янги, рақамлаштирилган «Жасорат музейи» фойдаланишга топширилди.

Ушбу музей аввал Меҳнат ва шуҳрат музейи номи билан ички ишлар бошқармаси биносида ташкил этилган, унга ташриф буюрувчиларга ноқулайлик туғдирганлиги боис академик лицейда қайта янгича қиёфада иш бошлади. Музей замонавий қиёфада ва рақамли технологиялар асосида янгиланиб, эндиликда унга нафақат соҳа ходимлари ва фахрийлар, фуқаролар ва мактаб ўқувчилари ташриф буюриши мумкин. 

Наманган вилоятида ички ишлар органларининг ташкил этилишидан бошлаб, бугунга қадар бўлган фаолияти ёритилган музей уч қисмдан  иборат бўлиб, улар қадимги даврда ҳуқуқ-тартибот органлари, Янги Ўзбекистонда ички ишлар тизими ва соҳавий хизматлар фаолиятига бўлинади.

– Музейда қадим пайтлардаги миршаблар, ҳарбийлар кийган кийимлар, қурол-аслаҳалар, байроқлар, погонлар, орден-медаллар ва тизимдаги йигирмага яқин соҳавий хизматлар фаолияти ҳамда тарихи ёритиб ўтилган. Бундан ташқари, террорчилардан олинган ашёвий далиллар, хусусан, қўлбола қуролларнинг салмоқли коллекциясини тўплашга муваффақ бўлинган. Улар орасида 1891 йилга оид салкам бир метрли карабиндан тортиб, кафтдек келадиган митти тўппонча, пулемёт қизиқишингизни орттиради, – дейди вилоят ИИБ ММИ ва КБТХ катта инспектори Сардорбек Ҳайдаралиев. – 1976 йилда ишлаб чиқарилган совет оғир мотоцикли кучли икки цилиндрли тўрт зарбли двигатель билан жиҳозланган. 

Маънавият маскани айниқса, соҳада ишлаш орзусидаги ёшларнинг севимли масканига айланди. Тарих ва келажакни боғловчи мазкур музей узоқ йиллар ёш авлодни ватанпарварлик руҳида тарбиялаш йўлида хизмат қилади.

Гулчеҳра БУВАМИРЗАЕВА.