ТЎРАҚЎРҒОНДАГИ ИСЛОҲОТЛАРГА ҲАМОҲАНГ ЎЗГАРИШЛАР

• 20.Июня.2020
• 1252

Вилоят ҳокими Хайрулло Бозоров Тўрақўрғон туманида соҳаларда амалга оширилаётган ишлар билан танишди.

«Туркистон» маҳалласи худудида янги барпо этилаётган 5 қаватли, 45 хонадонли, қиймати қарийб 7,5 миллиард сўм бўлган ушбу турар-жойни шу йил ноябрь ойида фойдаланишга топширилиши режалаштирилган. Бир пайтлар эътибордан четда ва қаровсиз қолиб кетган жойларда қад ростлаётган бинолар туман қиёфасини янада гўзаллаштириши баробарида серхаридордир.
Кумидон маҳалласида янги ўзлаштирилган 26,8 гектар майдонда мевали боғлар ташкил этиш бўйича тузилган корпорацияга 100 нафар фуқаро уюшган бўлиб, бу ерларда ўрик, узум, шафтоли, олма каби мевалар етиштирилади. Боғлар 50 нафар кам таъминланган оилалар вакиллари ва 50 нафар ёшларга тақсимлаб берилади. Вилоят ҳокими кооперацияда ишлаш истагини билдирган ёшларга бошқа юртга пул топиш учун боришга эҳтиёж йўқлиги, ўзимиздаги янги иш ўринлари ҳар жиҳатдан афзаллигини тушунтирди. 
Тумандаги қишлоқ хўжалиги коллежида ташкил қилинган марказда ёшлар асаларичилик, тикувчилик, ошпазлик, қандолатчилик, сартарошлик каби кўплаб йўналишларда касб сирларини эгаллашлари ва рус, инглиз тилларини ўрганишлари мумкин. Асалари қутилари сонини кўпайтириш ва бунга ўқувчиларни жалб этиш, ўзига хос асаларичилик кластерини ташкил этиш режалари вилоят ҳокими томонидан маъқулланди.
Туманнинг энг илғор фермерларидан бири – «Меҳнат шуҳрати» ордени нишондори Турсунбой Комилов раҳбарлигидаги хўжаликдаги пахта ва ғалла экинлари ривожи кўздан кечирилди. 133 гектар майдонга пахта ва яна шунча майдонга экилган ғалладан юқори ҳосил етиштириш кўзда тутилмоқда. Биргина ғалланинг ўзидан 300 тоннадан ошиқ дон хўжаликнинг ўзида қолиши ҳисоб-китоб қилинган. 
Хўжанд маҳалласидаги Узумзор кўчаси аҳолиси боғбон ва тадбиркорлиги билан шуҳрат қозонган. Хонадонларга кирсангиз томорқадан самарали фойдаланишнинг асл намунасини кўрасиз. Вилоят ҳокими уйларга кириб, фаол касаначилар билан суҳбатлашди. Қўл меҳнати маҳсулотларини кўздан кечирди. 
Умумтаълим мактабларининг битирувчи ўқувчилари – тадбиркорлик ҳамда ҳунармандлик йўналишларида шуғулланиш истагини билдирган 60 нафар ёшлар билан учрашув-мулоқот ташкил қилинди. Уларнинг аксарияти тадбиркорлик йўналишидаги аниқ режа-мақсадларини баён қилишди ва ёшларнинг ташаббуси қўллаб-қувватланиб, имтиёзли кредит ажратиш юзасидан банк ходимларига топшириқлар берилди.
Олчин маҳалла аҳли билан учрашувда вилоят раҳбари ҳар бир ҳудуд озода ва саришта бўлса одамларимизнинг дунёқараши ўзгариши, ёшлар ҳам улардан андоза олиши ҳақида гапирди.
Бир сўз билан айтганда, Тўрақўрғон туманида амалга оширилаётган ишлар, кўзга ташланаётган ўзгаришлар мамлакатимизда Президентимиз раҳбарлигида жадал олиб борилаётган ислоҳотларга ҳамоҳангдир. 

Зоҳидахон КЕНЖАЕВА,
туман ҳокимлигининг ахборот хизмати раҳбари.