Вазир сайёр қабул ўтказди

• 21.Февраля.2025
• 294

Жисмоний ва юридик шахсларнинг мурожаатларини ижобий ҳал этиш, аҳолининг дарду ташвишларини тинглаш бугунги кунда юртимиздаги барча даражадаги раҳбарларнинг устувор вазифасига айланган. Жумладан, вилоятимизга хизмат сафарини амалга оширган  республика олий таълим, фан ва инновациялар вазири Қўнғиротбой Шарипов иштирокидаги сайёр қабул ҳам кўплаб масалаларга ижобий ечим берганлиги билан ажралиб турди.

Наманган Давлат техника университети биносида бўлиб ўтган сайёр қабулда бир вақтнинг ўзида пойтахтимиздан туриб, вазирлик марказий аппарати мутасаддилари ҳам онлайн иштирок этди.

Тадбирда вилоятдаги олий, касбий таълим муассасаларининг профессор-ўқитувчилари ва талабалари томонидан турли таклиф, ташаббус ҳамда мурожаатлар билдирилди.

Масалан, университетда ёшлар медиа марказини очиш, аниқ, техника ва муҳандислик соҳаларида таҳсил олаётган талабаларни чет эл олийгоҳларига стажировка учун юборишни кўпайтириш, ёшлар ўртасида «Креатив ғоялар» фестивалини ўтказиш, ҳарбий кафедраларни ташкил қилиш, оила психологияси фанини ўқитиш, техникумларда қўшма таълим дастурларини очиш, хорижий талабалар учун ўқув адабиётларни кўпайтириш, тиббиёт техникумларида дуал таълимни йўлга қўйиш каби таклифлар илгари сурилди.

– Улуғ маърифатпарвар аллома, жадидчилик ҳаракатининг намояндаси, саккизта хориж тилларни билган Исҳоқхон тўра Ибрат номидаги давлат стипендиясини жорий этиш ва март ойини олий таълим муассасаларида Ибрат таваллуди муносабати билан маънавий-маърифий тадбирлар ойлиги, деб эълон қилиш ҳақидаги билдирган таклифларим маъқулланганидан хурсандман, – дейди Наманган давлат чет тиллар институтининг учинчи босқич талабаси Марғиёна Адашалиева. – Зеро, буюк аждодларимизнинг бой меросини асраб-авайлаш, уларга муносиб авлодлар бўлиб интилишимиз давлатимиз раҳбари орзу қилган Учинчи Ренессанс даврига туртки бўлиши шубҳасиз.

Қабул давомида мурожаатларнинг аксарияти жойида ижобий ҳал этилди, баъзи масалалар юзасидан эса ҳуқуқий тушунтиришлар берилди. Қўшимча ўрганиш талаб қиладиган мурожаатлар бўйича масъулларга тегишли топшириқлар юклатилиб, уларнинг ижроси назоратга олинди.

Йиғилганлар ушбу сайёр қабул соҳадаги муаммоларни аниқлаш, уларни ҳал этиш ва инновацион ривожланиш йўлида муҳим аҳамият касб этишини таъкидлашди.

Оқилхон ДАДАБОЕВ.